१४ सप्टेंबर

१४ सप्टेंबर

सत्पुरुषाची लक्षणे -

• तो पुष्कळांना मनापासून आवडतो.
• तो निःस्वार्थीपणाने राहून मनावर संयम ठेवतो.
• दुसर्‍याला बुडविण्याचा दुष्टपणा तो करीत नाही.
• जो ज्याप्रमाणे असेल त्याप्रमाणे तो त्याच्याशी वर्तन करतो.
• कोणाचीही निंदा किंवा स्तुती करीत नाही.
• मान घ्यायला योग्य असूनही मानाची अपेक्षा करीत नाही.
• स्वतःच्या विकारांवर त्याचा पूर्ण ताबा असतो.
• दुसर्‍याच्या दुःखात तो सुख देण्याचा प्रयत्न करतो.
• तो सहजावस्थेत राहतो.
• उपाधींमुळे तो बांधला जात नाही.
• त्याला सुख-दुःख बाधत नसल्याने तो समाधानी असतो.

- असा योगी मनुष्य मुक्त असतो. अशा लोकांना संत म्हणतात. भगवंताच्या प्रेरणेने व भगवंतासाठी संत कर्मे करतात. त्या कर्मांच्यापासून जगाचे कल्याण घडते. त्यांच्या प्रत्येक कर्मात प्रेम, दया, परोपकार, निःस्वार्थीपणा आणि भगवंताबद्दलची निष्ठा असते.

संतांवर श्रध्दा ठेऊन साधकाने कसे वागावे?

• अंतरंग ओळखायला स्वतःपासून सुरुवात करावी.
• आपले कुठे चुकते ते पाहावे.
• रामाकडे कर्तेपण द्यावे आणि त्याच्या इच्छने वागावे.
• संतांनी सांगितलेल्या मार्गाने जावे.
• संकटे, आपत्ती आल्या म्हणून भगवंताला विसरू नये.
• नामाविषयी फार चिकित्सा करीत बसू नये.
• साधन करताना अभिमान दूर ठेवावा. रामाशी अनन्य झाल्याने ते शक्य होते.

॥श्रीराम समर्थ॥